Wednesday, 15 June 2011

[Big Brothers & Sisters] New doc: ပိုလျှံနေသောဝါကျများ

created the doc: "ပိုလျှံနေသောဝါကျများ"
Rozoner King created the doc: "ပိုလျှံနေသောဝါကျများ"

[By Thiha Nwe]

 

     ပိုလျှံနေသောဝါကျများ

 

(၁)

ငါးဟာ.....

ရေကို မသိသလို၊

လူတွေဟာ....

မသိတာကလွဲလို့

အားလုံး သိခဲ့ကြတယ်

(၂)

ကြည့်ပါ

တခမ်းတနား နေထိုင်ဖ

ဘုရားသခင်က အစ

တစ်ခါသုံးဘောလ်ပင်အထိ

ကျွန်တော်တို့...

ဖန်ဆင်းခဲ့ကြ။

 

ဘာသာစကားကနေ

ဆင်ဖိုနီဓာတ်ပြားအထိ၊

အင်တာနက်ကနေ

ထရိုဂျင်းနစ် မြင်းရုပ်အထိ၊

အပျော်စီးသင်္ဘောကနေ

ငရဲကြီးရှစ်ထပ်အထိ၊

ကျွန်တော်တို့

ဖန်ဆင်းခဲ့ကြ။

 

စည်သွပ်ဘူးကနေ

ဆိုကရေးတီး အဆိပ်ခွက်အထိ၊

အိတ်ခ်ျအိုင်ဗွီပိုးကနေ

အင်္ဂါဂြိုဟ်သွားယဉ်အထိ၊

မိုးတိမ်အတုကနေ

ခေါင်းဖြတ်စက်အထိ

ကျွန်တော်တို့

ဖန်ဆင်းခဲ့ကြ။

 

ပစ်ရမစ်ကနေ

စက္ကူနဲ့လုပ်တဲ့ ပန်းအထိ၊

ဆံပင်ဆိုးဆေးကနေ

အာဏာရှင် စနစ်အထိ၊

လူကနေ...

လူပုံတူမျိုးပွားအထိ၊

ကျွန်တော်တို့

ဖန်ဆင်းခဲ့ကြ။

(၃)

ကျွန်တော်တို့ဟာ

သစ်ပင်ပေါ်က ဆင်းပြီး

အချင်းချင်းလက်ဆွဲနှုတ်ဆက်

'ဟဲလို၊ ဟိုင်း၊ ဟေး'

ယဉ်ကျေးခဲ့ကြပါတယ်။

 

လေးနဲ့မြားကို တင်တတ်အောင်

ကောက်တဲ့အခွန် ဆောင်တတ်အောင်

ထီးဖြူမိုးတတ်အောင်

ယဉ်ကျေးခဲ့ကြပါတယ်။

 

မိုးမျှော်တိုက်တွေကို ဂူလုပ်ဖို့

နေ၀င်ရင် မီးဖွင့်တတ်အောင်

တိုက်ပုံအင်္ကျီဝတ်တတ်အောင်

ယဉ်ကျေးခဲ့ကြပါတယ်။

 

ဒါဝင်က သင်မပေးရအောင်

ရေချိုးခန်းနဲ့ ရေချိုးတတ်အောင်

ကဗျာရေးတတ်အောင်

ယဉ်ကျေးခဲ့ကြပါတယ်။

တံတားဆောက်တတ်အောင်

ဥပဒေပြုတတ်အောင်

ကွန်ဒုံးသုံးတတ်အောင်

ယဉ်ကျေးခဲ့ကြပါတယ်။

 

ဖဲကစားတတ်အောင်

ဘုရားဖူးသွားတတ်အောင်

နျူကလိယားဗုံး လုပ်တတ်အောင်

ယဉ်ကျေးခဲ့ကြပါတယ်။

 

လပေါ် လမ်းလျှောက်တတ်အောင်

ကာကွယ်ဆေး ထိုးတတ်အောင်

ကိုယ့်အိမ်တံခါးကို လုံခြုံစွာပိတ်တတ်အောင်

ယဉ်ကျေးခဲ့ကြပါတယ်။

(၄)

ဒီလိုနဲ့...

ကျွန်တော်တို့

စားဖို့အတွက်

ပန်းကန်နဲ့ ချက်ပြုတ်နည်းတစ်ထောင်နဲ့

သူများအသက်နဲ့။

 

သောက်ဖို့အတွက်

အိုအေစစ်နဲ့ မိုးခါးရေနဲ့

ရေသန့်ဘူးစက်ရုံနဲ့။

 

နေဖို့အတွက်

လေအေးပေးစက်နဲ့

ပြက္ခဒိန်နဲ့

ရေလိုက်ငါးလိုက် အတွေးအခေါ်နဲ့။

 

ကြည့်ဖို့အတွက်

ရုပ်ရှင်ရုံနဲ့ ပန်းချီပြတိုက်နဲ့

တတ်ယောင်ကား မျက်စိနဲ့။

 

နားထောင်ဖို့အတွက်

ရေဒီယိုနဲ့ ဓာတ်ပြားနဲ့

နီရိုးဘုရင်ရဲ့ ဗျတ်စောင်းသံနဲ့။

 

ရှူ ရှိုက်ဖို့အတွက်

ပင်လယ်လေနဲ့ ရက်ဗလွန်ရေမွှေးနဲ့

မသူတော် '၇' ပါး ကိုယ်နံ့နဲ့။

 

စီးပွားရှာဖို့အတွက်

မတော်လောဘနဲ့ ချိန်ခွင်နဲ့

မာကင်တိုင်ဝါဒနဲ့။

 

စစ်တိုက်ဖို့အတွက်

လက်နက်နဲ့ သေနင်္ဂဗျူဟာကျမ်းနဲ့

နိုင်လိုမင်းထက်ဝါဒနဲ့။

 

အပျင်းဖြေဖို့အတွက်

စီးကရက်နဲ့ အလေလိုက်စရာနဲ့

အမဲပစ် ရိုင်ဖယ်နဲ့။

 

ငါမှန်ကြောင်း သူမှားကြောင်း

ပြောဖို့အတွက်

ပါးစပ်နဲ့ ကိုးကားစရာ စာအုပ်နဲ့

မိုးတစ်လုံး လေတစ်လုံး ဘ၀င်နဲ့။

 

ဖျားနာဖို့အတွက်

အထူးကုဆေးခန်းနဲ့ ရုပ်ခန္စာနဲ့

ကိုးဆယ့်ခြောက်ပါး ရောဂါနဲ့။

 

သေဆုံးဖို့အတွက်

သံသရာနဲ့ သင်္ချိုင်းနဲ့

(သေပြီးမှ).....

သတိရကြမယ့် လူတွေနဲ့

(၅)

ကျွန်တော်တို့မှာ

ဂေါတမဗုဒ္စ ရှိတယ်

နစ်ရှေး ရှိတယ်

မဟတ္တမဂန္ဒီ ရှိတယ်

စတာလင် ရှိတယ်။

မိုးဇက် ရှိတယ်

ဗာဂျီးနီးယားဝုဖ် ရှိတယ်။

သောမတ်အယ်ဒီဆင် ရှိတယ်။

ဂျက်ဆင်ပိုးလော့ ရှိတယ်။

အက်တလတ် ရှိတယ်။

ပီတာဝိုင်ယာ ရှိတယ်။

 

ဆစ်ဂမန်ဖရွိုက် ရှိတယ်။

ကိတ်ဝင်းဆလက် ရှိတယ်။

ဖူကူယားမား ရှိတယ်။

ယူတူးက ဘိုနို ရှိတယ်။

စတီဖင်ဟော့ကင်း ရှိတယ်။

အိုစမာဘင်လာဒင် ရှိတယ်။

 

ကျွန်တော်တို့မှာ

တိရိစ္ဆာန်ရုံ ရှိတယ်။

ဘေးမဲ့တော ရှိတယ်။

ဂေါက်ကွင်း ရှိတယ်။

အကျဉ်းထောင် ရှိတယ်။

စိပ်ပုတီး ရှိတယ်။

ဆန့်ကျင်ဖက်လိင် ရှိတယ်။

စီးနေတဲ့ မြစ်တွေ ရှိတယ်။

ပေါက်ကွဲမယ့် မီးတောင် ရှိတယ်။

ဝိုင်အိုလက်ပေါင်ဒါ ရှိတယ်။

အဏုမြူဓာတ်ပေါင်းဖို ရှိတယ်။

သစ်ခွပန်းရောင်စုံ ရှိတယ်။

အသားကြိတ်တဲ့စက် ရှိတယ်။

စားမရတဲ့ သစ်သီးတွေ ရှိတယ်။

လကွယ်ည ရှိတယ်။

ကျေးပိုင်ကျွန်ပိုင်စနစ် ရှိတယ်။

ချွေးနံ့ပျောက်ဆေး ရှိတယ်။

(၆)

ဒီလိုနဲ့

ခပ်တည်တည်နဲ့ပဲ

ကျွန်တော်တို့ဟာ

ဘယ်တော့ မိုးရွာမယ်ဆိုတာ

ကြိုတင်ပြောလို့။

ယုန် မြေမနင်းသားကို

ဓားနဲ့လှီးကာ

အရသာခံ ၀ါးလို့။

 

အလင်းနှစ်တစ်သန်းက ကြယ်ကို

နက္ခတ်ကြည့်မှန်ပြောင်းနဲ့ကြည့်လို့။

အပါယ်လေးဘုံကို

ဓာတ်လှေကား အလုအယက် ဆင်လို့။

ပိုတမ်ကင်သင်္ဘောက အမြောက်သံကို

စပျစ်ဝိုင်စုပ်ရင်း နားထောင်လို့။

ဧဒင်ဥယျာဉ်ကို

မပုပ်သိုးအောင် ဖော်မယ်လင် စိမ်လို့။

ထိုဝါဒ၊ ဟိုဝါဒတွေကို

ကိုယ်နဲ့တော်သလို အင်္ကျီချုပ်ဝတ်လို့။

ခပ်တည်တည်နဲ့ပဲ

ကျွန်တော်တို့ဟာ

စစ်ကြေညာလို့

စစ်ပြေငြိမ်းလို့

သစ်ပင်တွေကို ခုတ်လို့

သစ်ပင်တွေကို စိုက်လို့၊

လက်ထပ်ကြလို့

ကွာရှင်းကြလို့။

 

ခပ်တည်တည်နဲ့ပဲ

ကျွန်တော်တို့ဟာ

သရုပ်ဆောင်လို့

သရုပ်မဆောင်လို့၊

ရေကို စုန်လို့

ရေကို ဆန်လို့

တစ်ဝက်ကို စားလို့

တစ်ဝက်ကို ထွေးလို့။

 

ခပ်တည်တည်နဲ့ပဲ

ကျွန်တော်တို့ဟာ

ငါးတွေမျှားလို့

ငါးတွေလွှတ်လို့၊

မှားတာတွေ မှန်လို့

မှန်တာတွေ မှာလို့

သေရမှာ ကြောက်လို့

သေရမှာ မကြောက်လို့။

                         (၇)

                 သမိုင်း နိဂုံးချုပ်ခဲ့ပြီ

            ဂုဏ်ဆိုတာ ငွေကိုခေါ်တယ်

  ဘယ်သူတရားပျက်ပျက် ကိုယ်မပျက်စေနဲ့

      မြစ်တစ်မြစ်ထဲကို နှစ်ခါပြန်မဆင်းနိုင်

              စိတ်မလုံရင် တိတ္ထုံကြည့်

          အိုဇုန်းလွှာကို ကယ်တင်ကြပါ

အားလုံးဟာ လိုင်ဘီဒိုညာဉ်မှာ အခြေခံတယ်

       ငြိမ်းချမ်းရေးအတွက် စစ်လိုတယ်

     ဘုရားသခင်ဟာ ကြွေအန်မကစားဘူး

     စပါးတားကတ်ဆိုတာ ဘယ်သူလဲဟေ့

ဖြစ်တည်မှုဟာ အနှစ်သာရထက် ရှေးကျတယ်။

                    (၈)

                  သင်.....

               နေထိုင်ဖို့ရာ

    ပျော်ပျော်ရွှင်ရွှင် နေထိုင်ဖို့ရာ

                ဒါမှမဟုတ်

       မပျော်မရွှင် နေထိုင်ဖို့ရာ

                   ဘာမှ

                  မလိုပါ။

                  ဥပမာ

ဒီဝါကျတွေ အစ မလိုသလိုပေါ့။     ။

                                                       သစ္စာနီ

                                                       ဟန်သစ်၊ ၂၀၀၄၊ နိုဝင်ဘာလ


View Post on Facebook · Edit email settings · Reply to this email to add a comment.

No comments:

Post a Comment